இந்தி ஆங்கிலம் தொிந்தால் வங்கிக்கு வாருங்கள் என்று சொன்ன வங்கி அதிகாரியை விரட்டிவிட்டு வங்கிக்குப் பூட்டு போட்ட மக்கள்

 இந்தி ஆங்கிலம் தொிந்தால் வங்கிக்கு வாருங்கள் என்று சொன்ன வங்கி அதிகாரியை விரட்டிவிட்டு வங்கிக்குப் பூட்டு போட்ட மக்கள்.

புதுச்சேரி சம்பவம்!

புதுச்சேரியில் இந்தித் திணிப்பில் ஈடுபட்ட பஞ்சாப் வங்கிக்குப் பூட்டுப் போடப்பட்டது!

==================================

புதுச்சேரி - முதலியார் பேட்டையில் செயல்பட்டு வந்த பஞ்சாப் நேஷனல் வங்கியின் இந்தித் திணிப்புப் போக்கைக் கண்டித்து, இன்று (21.10.2022) காலை அவ்வங்கி இழுத்துப் பூட்டப்பட்டது.  

கடந்த 12.10.2022 அன்று, அவ்வங்கியில் கணக்கு வைத்துள்ள புதுச்சேரி தமிழ்த்தேசியப் பேரியக்கச் செயலாளர் தோழர் இரா. வேல்சாமி அவ்வங்கிக்கு சென்றபோது, அங்கு காசாளராகப் பணியாற்றும் இந்திக்காரப் பெண் அவரிடம் இந்தியில் உரையாடினார். வாடிக்கையாளர்களை சந்திக்கும் இடத்தில் இருக்கக்கூடிய ஊழியர்களுக்கு தமிழ் கட்டாயம் தெரிந்திருக்க வேண்டுமல்லவா எனக் கேட்டு, வங்கி மேலாளர் திரிபாதியிடம் தோழர் வேல்சாமி முறையிட்டார். அதற்கு பதில் அளித்த மேலாளர், “எங்களுக்கு இந்தி - ஆங்கிலம் தெரியும். ஆகவே இங்கு வரும் உங்களுக்கு இந்தியோ அல்லது ஆங்கிலமோ கட்டாயம் தெரிந்திருக்க வேண்டும்” என்று எஜமானர் தோரணையில் அடாவடியாகப் பேசினார். மேலும் அவ்வங்கியின் அனைத்துப் படிவங்களிலும் இந்தியும் ஆங்கிலமும் உள்ளதே தவிர, தமிழில் ஒரு படிவம் கூட இல்லை. 

புதுச்சேரி மண் - தமிழ் மண்; தமிழ் மண்ணிலே பணியாற்றக் கூடிய இந்திய அரசு மற்றும் பொது நிறுவன ஊழியர்கள் தமிழ் தெரிந்தவராக இருக்க வேண்டும். தமிழ் தெரியவில்லை என்றால் ஆறு மாதத்திற்குள் அவர்கள் தமிழ் கற்றுக் கொள்ள வேண்டும் என்பது விதி. எங்கு வேலை பார்க்கிறாரோ அந்த மண்ணின் மொழியை கற்றுக் கொண்டு அந்த மண்ணின் மொழியில் பேச வேண்டும். ஆனால், வேண்டுமென்றே தமிழரிடத்தில் தங்கள் தாய்மொழியான இந்தியில் பேசி, அடாவடி செய்கின்றனர். 

பஞ்சாப் வங்கியின் இந்த இந்தித் திணிப்புப் போக்கைக் கண்டித்தும், மேலாளரை மன்னிப்புக் கேட்கக் கோரியும், இன்று (21.10.2022) காலை அவ்வங்கியின் முதன்மை வாயிலை இழுத்துப் பூட்டும் போராட்டம் நடந்தது. முன்னதாக வங்கியின் துணை மேலாளர் பேச்சுவார்த்தை நடத்தியும் வங்கி சார்பில் எவ்வித உறுதிமொழியும் வழங்கப்படவில்லை. இந்நிலையில், வங்கியை தோழர்கள் தாங்கள் கொண்டு வந்திருந்த பூட்டால் பூட்டிவிட்டு, அதன் வாயிலேயே முழக்கமிட்டு அமர்ந்திருந்தனர். இந்நிலையில், வங்கி மேலாளர் தோழர் வேல்சாமியிடம் தனது பேச்சுக்கு மன்னிப்புக் கேட்டதுடன், 15 நாட்களுக்குள் வங்கி படிவங்கள் அனைத்திலும் தமிழ் இடம் பெறச் செய்வோம் என்று உறுதிமொழி அளித்தார். இதனைத் தொடர்ந்து போராட்டம் கைவிடப்பட்டது. 

தமிழ்த்தேசியப் பேரியக்கப் புதுச்சேரி செயலாளர் இரா வேல்சாமி தலைமையில் நடைபெற்ற போராட்டத்தில் பேரியக்கத் துணை பொதுச் செயலாளர் தோழர் க. அருணபாரதி, தமிழர் களம் புதுச்சேரி அமைப்பாளர் கோ. அழகர், நாம் தமிழர் கட்சி பொருளாளர் ம.செ. இளங்கோவன், நாம் தமிழர் தொழிற்சங்கச் செயலாளர் த. இரமேசு, தமிழ்த்தேசியப் பேரியக்க தெற்குக் கிளைச் செயலாளர் தோழர் அசோக்ராசு, வடக்குக் கிளைச் செயலாளர் தோழர் தே. சத்தியமூர்த்தி, தோழர்கள் மணி, ஆறுமுகம், முருகவேல், அரங்கதுரை, நாம் தமிழர் கட்சி தோழர்கள் மதியழகன், சுதாகர், ஜெகதீசு, எல்&டி கிருட்டிணமூர்த்தி உள்ளிட்டோர் பங்கேற்றனர்.

=================================

தலைமைச் செயலகம்,

தமிழ்த்தேசியப் பேரியக்கம்

=================================

பேச: 9443918095, புலனம் : +91 98419 49462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

=================================